أكيد كل بنت سألت نفسها السؤال ده فى مواقف كتير بنتعرض لها (احنا البنات فقط) مع اهالينا,في المدرسه, أو الجامعه, أو الشغل....مع صاحبك,خطيبك,او جوزك (بالمناسبه جابلك إيه فى فالنتاين؟).
ساعات بتحسّي إن العالم كله بيتآمر عليكي مش كده؟ ...و عايز يفقدك كل حريتك و عقلك و خصوصياتك و حتي طريقه تفكيرك.....! (لو فكرتي شويه هتلاقي ان ده انتي...علي الرغم من ان الفكره قد تكون مريضه شويه!) بس حاجات غريبه بتحصل..مش كده...؟
المهم مش الناس و لا المواقف....دي حنتكلم عنها بعدين، بس المهم دلوقتي ..ليه بنوافق؟
ليه بنوافق علي التنازل والتغيير والتحويل وغسيل المخ اللي عامل زي الغسيل اللي بتعمله الدول العظيمه فينا، ربنا يخليها لينا. فعلاً......تصدقوا.....هو كده بظبط..
احنا، البنات، مش عبط احنا فاهمين..و حاسين وشايفين كل حاجه..............بس بمزاجانا, و بمحض ارادتنا مستسلمين و مستعدين لاى تغيير أو تعديل فى شخصياتنا و طباعنا و طريقه كلامنا.......و أكلنا و شربنا و لبسنا...لحااااااااد وقفتنا و أصحابنا...
طب ليه.... ليه بنوافق هل من الواجب ان احنا نقعد نعد الاسباب و لا نتوقف عند هذا التغيير؟...... ما هو إنتي اتغيرتي و بقيتي حد تاني غير اللي كنتى عليه. البنت اللي اتولدت بريئه و المفروض كانت تكون شخصيتها صافيه, و مستقله........
طب بنوافق ليه مع اننا عمالين نزعق و نقول البنت زي الولد و من حقنا نعمل اللي عايزيه....و كلام من ده كتير. و ده كوم و اللي تطلع لوحدها كده و تقول "احنا احرار و عمرنا ما حنعمل حاجه غصباً عننا" كوم تانى.........بلا نيله..............!
ما هو إنت بتتغيري و بتتلوني بالعافيه.....فماتعمليش جدعه.....
طب اقولكم حاجه:
- ليه بنعمل نيو لوك كل شهر؟
- ليه بنعمل دايت او ناخذ كورس تغذيه؟
- ليه بنغير طريقه كلامنا مع كل بني ادم جديد بنتعرف عليه, سواء كان صديق, أو صديقه...زميل او زميله؟؟؟؟؟؟
- ليه الزوجه بتروح للكوافير و تغير لون و قصية شعرها علشان خايفه جوزها يخونها مع صاحبتها اللي جتلهم البيت و ابدي جوزها اعجابه بلون وقصية شعرها اللي مخلياها شبه هيفاء وهبي ؟
- ليه البنت بتغير من طريقه كلامها لما بتتعرف علي صحاب جداد و يكونوا بيحشروا الانجليزي فى كل جمله مفيده وغير مفيده. تقوم البنيّه تروح تحفظ لها كلمتين هي كمان وعادة بتكون Just و Whatever !!!!
-ليه البنت بتتحجب و تلبس الحجاب لما صاحبها يقول لها مع انها كانت مقضيها بقالها تلاتاشر سنه فى مارينا و الغردقه؟
اسئله لمواقف لو وقفنا عندها مش بعيد نتجنن.بس ضروري نحاسب و نراقب نفسنا.
يعنى التغيير جميل بس ليه مانعملوش من نفسنا و لنفسنا.
ليه ما بنكونش احسن الا علشان حد معين؟
هل علشان بنحبهم؟
يمكن......!
بنخاف يضيعوا مننا؟
اكيد حنخاف لو بنحبهم...
طب ليه مانجربش نعمل كل الحاجات الحلوه دي علشاننا احنا؟...ما هما عرفونا و رضيوا بينا و إحنا كده.....مش برضه كده؟
أقولك حاجه مني ليكى، خليكى انانيه و كوني اللي عايزه تكونيه علشانك انتي بس.
صدقيني مهما فضلتي تعملي علشان غيرك مش لنفسك، هييجي يوم و نفسك حتزعل منك و تخاصمك بعد ما إستحملتك كتييييير قوى.
إن لصبرالنفس حدود يا.........بناااااااات
No comments:
Post a Comment